Como unha das iniciativas máis destacadas da Cátedra Denodo UDC de Enxeñaría de Datos, IA e Innovación Tecnolóxica, crearase un premio especial en honra de Paula Montoto Castelao, docente da UDC e unha das primeiras profesionais de Denodo, falecida a comezos de 2025.

O Premio ao Mellor Traballo de Fin de Grao (TFG) en Informática con Aplicacións Empresariais nace como unha homenaxe duradeira á súa figura e a unha traxectoria de máis de 25 anos en Denodo, onde desempeñou un papel decisivo no desenvolvemento e crecemento da compañía. Como referente en I+D e figura clave no ámbito técnico, Paula contribuíu de maneira decisiva ao éxito da Plataforma Denodo.

Ademais da súa destacada carreira profesional, o seu labor como profesora da UDC durante máis de dúas décadas permitiulle formar e acompañar varias xeracións de enxeñeiros e enxeñeiras, deixando unha pegada fonda no ecosistema tecnolóxico galego e internacional.